Радин мост е најпознатиот мост на Кратово кој е и најпознатата знаменитост во овој град. Се наоѓа на крајот на градот, во Чаир Маало. Изграден е на две кули високи 28 и 29 метри.
Историјатот за мостот покажува дека тој датира уште од 14 век кога познатиот мајсто Раде изградил мост познат под името Радев мост. На двете страни од мостот имало стражарници на кои се наплаќала патарина во натура. Околу 1820 година мостот бил уништен откако претходно бил погоден од гром.
Но легендата за мостот е нешто друго. Според истата мостот го граделе деветмина браќа, но како граделе, така преку секоја ноќ тој постојано се рушел. Еден ден сите браќа се договориле која од нивните сопруги ќе им донесе ручек утредента, таа да ја заѕидаат во темелите на мостот, верувајќи така дека тој повеќе нема да се руши.
Сите браќа им кажале на сопругите утре да не им носат ручек – освен најмладиот кој заборавил. Утредента, младата Рада го зготвила ручекот и го однела на мајсторите. Како што бил договорот така и направиле. Младиот брат ги молел, ги преколнувал браќата да не го прават тоа, ја молел и Рада да му прости бидејќи заборавил да ѝ каже, но веќе било доцна. Последната желба на младата Рада била да и ја остават десната града да си го дои малото си машко дете, која и била исполнета. Оттогаш до ден денес се прераскажува легендата за младата Рада, која е заѕидана во темелите на „Радин мост“.
Оваа легенда е опеана во народната песна „Мост ми ѕидаја девет мајстора“.
Мост ми ѕидат девет мајстора
девет мајстора, до девет браќа.
Мост ми ѕидат во Кратово
во Кратово, на река Манцева.
Дење го ѕидат, ноќе мост им паѓа
се опкладиле деветте браќа:
која ќе снаа утре да дојде
ручек да донесе на мајсторите
нејзе ќе ја в’ темел заѕидаме
да ни затрае мост на реката.
Вечерта кога дома дојдоа
сите им кажале на невестите,
само не ѝ кажа најмалото братче
он не ѝ кажа на Рада невеста.
Станала Рада ручек зготвила
ручек им однела на мајсторите.
Kога ја видело Радино момче
викнало оно на глас да плаче.
Кога ја фанаа Рада девери
ја заѕидаја во темели.
Рада на девери милно се моли:
– Барем остајте ми десната града.
Барем остајте ми десната града
за да си надојам машкото дете.
Ѝ оставија десната града
за да си надои Рада единче.
