Министерот за внатрешни работи Панче Тошковски денеска категорично ги демантираше наводите што се појавија на социјалните мрежи, дека убиената Росица Коцева неколку месеци пред трагичниот настан му испратила СМС-порака со барање за помош.
Изјавата на Тошковски дојде по прашање на весникот „Слободен печат“, откако на интернет почна да кружи фотографија со содржина на наводна порака. Во неа, Росица накусо објаснува низ што поминува и бара помош за нејзината „безисходна ситуација“.
На фотографијата, меѓутоа, недостигаат клучни детали – не е видлив датумот на испраќање, а од телефонскиот број недостасуваат последните три цифри, што дополнително ја доведува во прашање веродостојноста.
Во наводната порака, која се споделува на социјалните мрежи, пишува:
„Се надевам дека пишувам на правилно место и дека конечно некој во оваа држава ќе отвори уши и очи за мојата безисходна ситуација. (…) Човекот кој од декември, па наваму ме демне, ме тепа и нанесува друг вид насилство, силува, прогонува и последно пред пет дена ми ја запали колата е сè уште на слобода. Вратен му е пасошот од МВР и во моментов слетува во Берлин.“
Во продолжение на пораката е наведен и број на предмет во скопското обвинителство и Судот во Велес.
„Содржината на пораката не е веродостојна,“ изјави министерот Тошковски, нагласувајќи дека МВР ги истражува сите околности поврзани со случајот.
