Вашингтон, 5 февруари 2025 (МИА) – Американскиот претседател Доналд Трамп изјави дека би било добра идеја да се испратат криминалци Американци во затвори во друга земја, додавајќи дека има земји што ќе прифатат криминалци од САД.
Американскиот државен секретар Марко Рубио вчера ја опишал како „многу великодушна“ понудата на салвадорскиот претседател Најиб Букеле за прифаќање опасни криминалци од САД во затворите во неговата земја, наведувајќи дека администрацијата на Трамп ќе мора да го анализира тој предлог.
„Очигледно ќе мораме да го разгледаме тоа од наша страна, очигледно има правни прашања околу тоа. Имаме устав, имаме секакви работи, но ова е многу дарежлив предлог“, рече Рубио. Американскиот претседател подоцна рече дека ќе го прифати планот „веднаш“ доколку има законско право да го стори тоа и дека ќе биде поевтино од држењето затвореници во приватни затвори во САД.
Од Златко Шумковски/МИА
