Вашингтон, 30 мај 2025 (МИА) – Американскиот претседател Доналд Трамп ќе ја одржи традицијата американски генерал да биде врховен командант на НАТО, барем засега, јавија американски медиуми повикувајќи се на тројца американски функционери, еден западен функционер и извор од НАТО.
Трамп ги даде тие забелешки во приватен разговор со генералниот секретар на НАТО, Марк Руте, рече западниот функционер, зборувајќи под услов да остане анонимен.
Одлуката ќе ги увери европските сојузници на НАТО, па дури и некои од колегите на Трамп од Републиканската партија, поради загриженоста дека тонот на Вашингтон кон Европа и скептицизмот во врска со војната во Украина би можеле да доведат до повлекување на САД од својата лидерска улога.
Според американските функционери, се очекува САД во наредните денови да го номинираат генерал-потполковник на американските воздухопловни сили Алексус Гринкевич за следен врховен командант на сојузничките сили на Европа и началник на американската европска команда.
Функцијата врховен командант на сојузничките сили на Европа, која е одговорна за сите операции на НАТО во Европа, ја извршува американски генерал од нејзиното создавање по Втората светска војна.
Гринкевич, моментално е началник на операциите во Здружениот генералштаб на американските вооружени сили, и ќе ја преземе функцијата од генералот Кристофер Каволи, кој беше назначен на функцијата кратко по почетокот на руската инвазија на Украина во февруари 2022 година.
Од Златко Шумковски Извор МИА
