Претседателката на Македонија, Гордана Сиљановска Давкова, објави на својата Фејсбук страница дека добила честитка од американскиот претседател Доналд Трамп по повод 34-годишнината од Денот на независноста на Македонија, кој се одбележува на 8 Септември.
Во објавата, Сиљановска Давкова изрази длабока благодарност за добиените честитки, оценувајќи ги како важен знак на цврстото пријателство и стратешкото партнерство помеѓу САД и Македонија. “Искрена благодарност до претседателот на САД и американскиот народ за честитките по повод 34 годишнината од 8 Септември,” напиша таа.
Таа истакна дека пораките на признание, разбирање и поддршка, кои ги содржи честитката, се не само потврда на силното пријателство, туку и основа за понатамошно унапредување на односите. “Потребни се во време на обиди за ставање крај на воените конфликти, справување со меѓународниот криминал и гарантирање на траен мир и безбедност,” додаде Сиљановска Давкова.
Честитката од Трамп, која му ја предаде амбасадорката Анџела Агелер, е важен момент во односите меѓу двете земји и потврда за заедничките вредности и цели.
