Советот на Општина Македонска Каменица на денешната четврта седница донесе одлука за прогласување тридневна жалост на територијата на општината, по повод смртта на сограѓанката, младата Симона Каранфиловска.
Согласно одлуката, деновите 30 и 31 декември 2025 година, како и 1 јануари 2026 година, се прогласуваат за денови на жалост. Во наведениот период ќе бидат одложени сите настани од забавен карактер кои беа планирани по повод новогодишните празници.
Во знак на почит и сочувство, државните знамиња пред јавните институции на подрачјето на општината ќе бидат спуштени на половина копје.
Одлуката стапува во сила веднаш по нејзиното донесување, а ќе биде објавена во „Службен гласник на Општина Македонска Каменица“.
Од Советот на општината упатија изрази на длабоко сочувство до семејството, роднините и најблиските на починатата.
