Центарот за јавно здравје Куманово (ЦЈЗ) вчера објави дека е регистрирана епидемија на труење со храна кај шест лица кои учествувале на семинар-обука на 11 септември во еден ресторан во Куманово. Од вкупно 36 присутни на настанот, шест лица развиле симптоми на труење, вклучувајќи повраќање, дијареја, треска, температура до 41 степен, како и болки и грчеви во стомакот.
Според информациите, двајца од заболените се хоспитализирани, тројца се на дневна болница, а еден е на домашно лекување. „Вчера, Одделение за епидемиологија при ЦЈЗ Куманово пријави епидемија на ‘алиментарна токсоинфекција’ за шест пријавени – заболени со знаци на труење со храна од вкупно 36 експонирани лица“, изјавија од ЦЈЗ Куманово.
Симптомите на труење со храна се појавиле по консумирање на храната во надворешниот дел на ресторанот во вечерните часови на 11-ти септември. Заболените се жалеле на обилни повраќања, честички водникави столици на секои 10, 15 или 20 минути, малаксаност, температура до 41 степен, треска, болки и грчеви во стомакот, како и главоболка.
По добивањето на првите пријави за заболени, епидемиолозите од ЦЈЗ Куманово, заедно со подрачните единици на ДСЗИ и АХВ, извршиле координиран надзор во ресторанот и зеле брисови и мостри од храната за микробиолошко испитување. „Преземени се сите хигиено-епидемиолошки соодветни противепидемиски мерки. Објектот е затворен до добивање на негативни резултати на испитуваните материјали“, додадоа од ЦЈЗ Куманово.
