На покана на Хидрометеоролошкиот завод на Србија, делегација од Управата за хидрометеоролошки работи на Република Македонија, предводена од директорот Игор Лазаровски и г. Раде Балабаноски, учествуваше на регионален состанок на хидрометеоролошките управи од југоисточна Европа, кој се одржа во Белград.
На состанокот присуствуваа претставници од националните метеоролошки и хидролошки служби на Словенија, Босна и Херцеговина, Република Српска, Црна Гора, Романија, Хрватска, Кипар, Бугарија, Грција, Турција, Украина и други земји. Во рамки на работните сесии беа разменети искуства и дискутирани тековните достигнувања, предизвици и идните приоритети во областа на хидрометеоролошките услуги.
Хидрометеоролошките податоци, информации и услуги се клучна основа за носење одлуки – од дневно и сезонско планирање до долгорочни инфраструктурни и развојни политики. Преку заедничка работа и размена на податоци, придонесуваме кон побезбеден, посигурен и попросперитетен свет.
Слободната и неограничена размена на метеоролошки и хидролошки податоци, производи и услуги е суштинска за националната безбедност, како и за сите сектори чувствителни на климатски промени – вклучувајќи земјоделство, транспорт, енергетика, управување со водни ресурси, здравство и други.
Секоја минута, податоци од илјадници хидрометеоролошки станици ширум светот се испраќаат до центри за прогнозирање. Тие податоци вклучуваат милиони мерења од сателити, земјени станици, метеоролошки балони, океански пловци, бродови и авиони. Без меѓународната координација и поддршка на глобалната мрежа, ниту една држава самостојно не би можела да обезбеди навремена и прецизна прогноза.
Во услови на глобални климатски предизвици и екстремни временски појави, меѓународната соработка и солидарност се поважни од било кога.
Извор:uhmr.gov.mk
