Управата за јавни приходи (УЈП) соопшти дека 2025 година е заокружена со значителен раст на јавните приходи, при што во државниот буџет се слеале вкупно 4 милијарди и 426 милиони евра од даноци и социјални придонеси. Тоа претставува зголемување од 308,3 милиони евра во споредба со 2024 година.
Според податоците на УЈП, даночните приходи достигнале 2 милијарди и 334 милиони евра, што е раст од 7,5 проценти, односно 163,2 милиони евра повеќе од претходната година. Порастот бил континуиран во текот на целата година, но со поинтензивна динамика во втората половина од 2025 година, кога биле реализирани околу 80 проценти од вкупниот годишен раст.
Особено значаен придонес има наплатата на данокот на додадена вредност (ДДВ), која се темели на зголемен промет во земјата. Во повеќе месеци од годината евидентиран е раст од 10 до 13 проценти во однос на истиот период лани. Кај данокот на добивка, зголемувањето произлегува од повисоката даночна основица за 2025 година, како и од зголемената наплата на задржан данок од дивиденди и други приходи исплатени кон странски сопственици и партнери, каде што е забележан раст од над 30 проценти.
Во сегментот на данокот на личен доход, најголем удел има данокот на плати, кој бележи стабилен месечен раст и вкупно зголемување од повеќе од 10 проценти. Висок раст е регистриран и кај данокот од договорни услуги, земјоделска дејност и самостојна работа.
Социјалните придонеси во 2025 година изнесуваат 2 милијарди и 92 милиони евра, што е за 145,2 милиони евра повеќе од 2024 година, односно раст од 7,5 проценти.
Од УЈП посочуваат дека овие резултати се должат на подобрената навремена наплата, раното интервенирање кај ризичните обврзници и доследната примена на законските механизми, како и на зголемената одговорност кај даночните обврзници.
Во 2026 година, како што најавуваат од Управата за јавни приходи, ќе продолжат активностите насочени кон ефикасно, правично и транспарентно собирање на јавните приходи, со цел дополнително зајакнување на фискалната стабилност на државата.
