Потешко од очекуваното, но тимот на Вардар попладнево, на неутрален терен во Струмица, во рамките на 4. коло од Прва МФЛ го совлада Шкупи со конечни 4:2.
Пет од шесте погодоци беа постигнати во првото полувреме, кое беше едно од највозбудливите во последно време во домашниот шампионат.
Мечот започна шокантно, уште во 9. секунда, Мухарем ја искористи несигурноста во одбраната на Вардар, а по интервенцијата на Матиќ топката заврши во мрежата за водство на Шкупи.
Вардар брзо се врати во игра и преку Димитар Данев, кој со глава реализираше на асистенција на Михаил Маневски, израмни на 1:1 во 16. минута.
Целосниот пресврт пристигна во 36. минута, кога Азер Омерагиќ погоди за 2:1, но Шкупи повторно ја врати резутлатската неизвесност. По нова несигурност во одбраната на Вардар, Дестани успеа да реализира за 2:2.
Сепак, Вардар замина на полувреме со предност. Акцијата на Кастањеда и Маневски заврши со прецизен удар со глава на Закариќ за 3:2.
Во второто полувреме Вардар комплетно доминираше, создавајќи неколку шанси, а конечниот резултат 4:2 го постави Едис Спахиу, кој во последните моменти реализираше од втор обид по брзиот против напад на Вардар.
Извор/Фото:www.ffm.mk
