Фудбалерите на Вардар дојдоа до втората победа во новиот шампионат, откако денеска го совладаа Тиквеш на гостувањето во Кавадарци со 1:2. Сите три гола се случија во вториот дел, кога гостите дојдоа до предност од два гола, а Тиквеш на крајот само успеа да го ублажи поразот.
Закариќ ја имаше првата одлична можност во 20. минута од натпреварот да му донесе предност на Вардар, Стевковски беше брилијантен и одбрани во корнер.
Најголемата шанса за Тиквеш ја имаше Ивановски во 34. минута. Стојанов проби по десната страна, го мина и голманот Талески, додаде до Ивановски кој имаше празен гол, но пред него се испречи Данев и не дозволи домашниот тим да поведе. На полувреме се замина со 0-0.
На стартот од вториот дел Матиќ со глава се обиде, а топката заврши за малку крај голот на Тиквеш.
Во 52. минута водство за Вардар. Досуден корнер за „црвено-црните“ од Скопје, кој го изведе Босанчиќ, убаво асистираше до Матиќ, а стоперот на Вардар со глава го совлада Стевковски.
Тиквеш се обиде да дојде до израмнување преку Ивановски во 66. минута, неговиот удар заврши во стативата и во гол аут.
Казната на спротивната страна стигна само две минути подоцна. Повторно изведен корнер од страна на Босанчиќ, и повторно Матиќ скокна највисоко скокна и со глава го погоди само дирекот, а топката се одби до Мато кој успеа да ја спроведе топката во голот за водство од 2:0 за Вардар.
Само една минута подоцна Тодоровски можеше да донесе и водство од 3:0, но Стевковски овојпат беше поуспешен.
Конечно, Ивановски, играчот на Тиквеш успеада се запише во листата на стрелците во судиското надополнување во својата трета шанса на натпреварот. Од дваесетина метри Ивановски се одлучи на удар совладувајќи го немоќниот Талески. Сепак, голот се случи многу доцна и Тиквеш немаше можност да дојде до шанса да го избегне поразот.
Извор:www.ffm.mk
