Венко Крстевски, актуелниот в.д. градоначалник на Кочани, денеска ја објави својата независна кандидатура за градоначалник на предстоящите локални избори, кои ќе се одржат на 19 октомври 2025 година. Во својата објава на Фејсбук, Крстевски истакна: “Денес, на 28 август 2025 година — на празникот Успение на Пресвета Богородица, ден исполнет со љубов, надеж, обновување и заштита — со голема одговорност и почит, ја објавувам мојата независна кандидатура за градоначалник на Кочани. Нашиот град заслужува повеќе. Заслужуваме безбедно, чисто и модерно Кочани — град кој ќе се развива со срцето на Европа, но управуван од волјата на сопствените граѓани.”
Крстевски смета дека во изминатите четири месеци, иако кратки, е постигнат значителен напредок во градот. Тој нагласи дека е важно да се покаже дека со волја можат да се најдат решенија. “Ова е првото лето кога депонијата не гори. Ова е првото лето кога Кочани не дише пластика. Тоа не е случајност. Тоа е резултат на работа, храброст и одлуки.”
Тој исто така спомена значајни дипломатски средби со амбасадори, кои ќе бидат партнери во обновата на Кочани, град кој долго време бил занемаруван. “Јас не ветувам чуда. Јас покажав резултати. Во најтешките моменти бев тука. Не пред камерите, туку пред народот, лице в лице, без страв и без калкулации.”
Крстевски нагласи дека неговата цел не е да владее, туку да служи. “Ова не е политичка битка. Ова е граѓанска обврска. Да покажеме дека Кочани може поинаку! Достоинствено, европски и човечки. Да го вратиме гласот на граѓаните. Да го вратиме достоинството на градот. Да ја вратиме локалната самоуправа на граѓаните! Со срце и душа за Кочани,” заврши Крстевски.
