Римските Шпански скали, една од најпознатите и најфотографирани туристички атракции во главниот град на Италија, повторно се најдоа во центарот на вниманието – но овојпат не поради филм, модна ревија или романтична сцена, туку поради бизарен инцидент.
Наутро, на 17 јуни, осумдесетгодишен маж управувал со „Мерцедес А-класа“ и – се спуштил со автомобилот по историските скали, без никаква очигледна причина. Необичната сцена била снимена од вработен во близок хотел, кој го забележал моментот кога компактниот автомобил внимателно се симнува по скалите.
Возачот, облечен во костум и вратоврска, изјавил пред полицијата дека мислел дека оди на работа, но не можел да објасни како завршил токму на тоа место.
Како што пренесува Jutarnji.hr, полицијата веднаш реагирала. Тестот за алкохол бил негативен, но на возачот веднаш му била изречена парична казна. Иако во моментот имал важечка возачка дозвола, властите сега го разгледуваат случајот за да проценат дали тој е психофизички способен да управува со возило.
Идентитетот на возачот не е објавен, а засега не е познато дали ќе му бидат изречени и дополнителни санкции.
Возилото било отстрането со помош на противпожарна дизалица, а експерти од италијанското Министерство за култура го анализираат споменикот за да утврдат дали е нанесена материјална штета.
Шпанските скали, изградени на почетокот на 18 век, се заштитено културно-историско богатство и важен симбол на Рим.
Ова не е првпат автомобил да заврши на Шпанските скали. Во 2022 година, саудиски државјанин со изнајмен „Масерати“ се обидел да се симне по истите скали, при што предизвикал тешко оштетување на споменикот и подоцна бил уапсен и обвинет за уништување на културно наследство.
Инцидентот уште еднаш ја отвора дебатата за безбедноста на туристичките знаменитости и потребата од поголема контрола и заштита на светските културни споменици.
