Тројно убиство со елементи на бруталност ја потресе јавноста во регионот, откако во Боливија беа пронајдени телата на тројца мажи – еден македонски и двајца српски државјани. Според неофицијалните информации објавени од белградска „Политика“, жртвите биле претходно мачени, а нивните тела биле спакувани во црни пластични вреќи.
Телата се испратени на обдукција за утврдување на точната причина за смртта, а официјална идентификација сè уште не е потврдена од надлежните органи. Медиумите, сепак, јавуваат дека македонскиот државјанин е Дејанчо Л., додека еден од српските државјани е Миљан Ќ., познат под прекарот „Итри“ од Ниш – лице за кое се верува дека било вмешано во меѓународна криминална мрежа за трговија со кокаин меѓу Јужна Америка и Западна Европа.
Полицијата се сомнева дека убиствата се извршени пред два дена на територијата на Боливија. И третиот убиен, исто така од Србија, според информациите, се движел низ Јужна Америка користејќи лажни документи.
Истражната постапка е во тек, а боливиските власти соработуваат со меѓународни безбедносни служби за целосно расветлување на случајот. Според првичните проценки, убиствата најверојатно се поврзани со активности на меѓународни нарко-картели и меѓусебни криминални пресметки.
