Министерството за внатрешни работи соопшти дека презело итни оперативни мерки по појавата на видео на социјалните мрежи, на кое се гледа лице како управува патничко моторно возило со екстремна брзина од 293 километри на час на автопатот Скопје–Гевгелија, во близина на Неготино.
Станува збор за делница каде што максимално дозволената брзина е 120 километри на час, што значи дека возачот ја надминал дозволената брзина за повеќе од двојно, сериозно загрозувајќи ја безбедноста во сообраќајот.
По објавата на видеото, Секторот за сообраќајни работи и Мобилната единица за безбедност на патниот сообраќај веднаш започнале активности за идентификација на сторителот. Како што информираат од МВР, возачот бил брзо пронајден и повикан на службен разговор.
Се работи за А.Д. (36) од скопското село Елово, кој е санкциониран согласно важечките законски прописи. Од МВР не соопштуваат дополнителни детали за висината на казната, но нагласуваат дека станува збор за сериозен прекршок.
Од Министерството апелираат до сите учесници во сообраќајот да ги почитуваат правилата и ограничувањата, потенцирајќи дека неодговорното возење може да има трагични последици и дека безбедноста на патиштата е заедничка одговорност.
