Сообраќајот на државните патишта се одвива непречено, по влажни коловози, додека интензитетот на сообраќај надвор од градските средини е умерен. На граничните премини од македонска страна нема подолги задржувања за влез и излез од државата.
Од АМСМ потсетуваат дека од 15 ноември е на сила законската обврска за задолжително поседување зимска опрема во возилата, која ќе трае до 15 март 2026 година, без оглед на моменталните временски услови.
Возачите се повикуваат на зголемена внимателност, прилагодена брзина и почитување на сообраќајната сигнализација, особено на патиштата низ котлините, речните долини и клисурите, каде постои опасност од одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Патниот правец Охрид – Ресен преку Националниот парк Галичица е затворен за сообраќај за сите видови возила во периодот од 21 ноември 2025 до 31 март 2026 година.
Во меѓувреме, на повеќе патни правци низ државата се изведуваат градежни работи со изменет режим на сообраќај, меѓу кои и на скопската обиколница, експресниот пат Крива Паланка – Страцин, како и на делници од патиштата Гостивар – Стража и Прилеп – Битола.
