Македонските возачи веќе возат под најстрогиот систем на казни досега – а многумина не ни знаат колку може да ги чини само една грешка на патот. Според деталниот преглед изготвен врз основа на Законот за безбедност на сообраќајот на патиштата и Законот за превоз во патниот сообраќај, санкциите достигнуваат од 15 евра па сè до 2.500 евра, а дел од прекршокот носи и одземање на возачка дозвола или дури и возило.
Казни до 500 евра – најскапите грешки што можете да ги направите зад воланот
Највисоката казна – 500 евра – се изрекува за возач што ќе одбие алко-тест или тестирање за дрога. Освен огромната глоба, следува и автоматска забрана за управување со возило во траење од една година.
Строги казни има и за возење под дејство на алкохол, каде професионални возачи и почетници може да платат 375 евра, но и да загубат дозвола на 12 месеци.
Брзината и понатаму е најчестиот „убиец“ на паричници
Возач кој ќе „летне“ низ населено место со 30 до 50 km/h над дозволеното веднаш добива казна од 300 евра и забрана за управување до една година. Истата казна важи и за прекумерна брзина надвор од населени места.
Дури и возачи на автобуси и камиони што ќе ја надминат ограничената брзина за само 10 km/h се соочуваат со казни од 300 евра.
250 евра казна за грешки кои секојдневно ги гледаме на улиците
Непропуштање пешаци, поминување на црвено светло, неправилно престигнување или непочитување наредба од полицијата – секој од овие прекршоци носи по 250 евра казна и забрана за управување.
Возење без возачка дозвола? Исто така 250 евра.
Казни од 40 до 200 евра – најчестите „финансиски стапици“
Тука спаѓаат најраспространетите прекршоци:
– користење мобилен телефон за време на возење (40 евра),
– некористење сигурносен појас (40 или 50 евра),
– истечена возачка дозвола (100 евра),
– погрешно престигнување (150 евра),
– незаконско паркирање на клучни места (180 евра).
Возачите на електрични тротинети сè почесто добиваат казни – за пребрзо возење глобата е 120 евра, а за возење без шлем или со телефон – 50 евра.
Посебен дел – казни за превозници: глобите се мерат во илјадници евра
Највисоката казна од Законот за превоз во патниот сообраќај изнесува 2.500 евра и се изрекува на превозници што работат без лиценца, без дозвола или со фалсификувани документи. Во некои случаи на овие фирми им се одзема и возилото.
Превоз без технички исправно возило, непочитување возен ред или возење без документи носи 1.850 евра казна, додека нерегуларен такси превоз или неисправен таксиметар чини 1.300 евра.
Дури и патник без билет плаќа – глоба од 50 евра.
Сообраќајните правила никогаш не биле поскапи
Сообраќајните закони сè повеќе се движат кон строга европска пракса. Една грешка што трае неколку секунди може да ве чини месечна плата – или цело возило.
Овој преглед е предупредување, но и потсетник дека дисциплината во сообраќајот не е само законска обврска – туку прашање на безбедност и одговорност.
