Српскиот претседател Александар Вучиќ на последната прес-конференција испрати јасна порака дека државата е подготвена на силен одговор кон протестите што деновиве ја тресат Србија. Тој нагласи дека не се разгледува воведување вонредна состојба, но оставил рок од неколку дена за да се следат чекорите на демонстрантите.
„Како тргнале, тие ќе убијат некого. Но за неколку дена, ќе следува многу силен одговор од државата со сите средства што ни се на располагање“, изјави Вучиќ, обвинувајќи ги организаторите дека немаат идеологија и дека нивниот единствен „јазик“ е насилството.
Односот со странскиот притисок
Претседателот нагласи дека Белград нема да се плаши од меѓународен притисок. Спомена разговор со странски дипломат кој реагирал за уништување простории на политичка партија. „Го прашав дали знае чии простории се уништени. Само на една партија. Тогаш добив одговор дека можеби мислел и на тоа. Но, ако не се уништени други, на што мислеше? Одговор не добив“, изјави Вучиќ, додавајќи дека критиките однадвор нема да ја променат политиката на власта.
Остра критика кон образованието
Во своето обраќање, Вучиќ упати и жестоки критики кон образовниот систем, тврдејќи дека факултетите во Србија се претвориле во „дувла и свињарници“. „Образованието беше укинато, децата учат и знаат многу помалку. Родителите што го поддржуваа тоа сега ги гледаат последиците. Уништениот систем доведе до факултети претворени во свињарници“, нагласи тој, префрлајќи ја вината и врз студентите кои се дел од протестите.
Демонстрантите – „лажговци и измамници“
Вучиќ ја опиша општествената клима како сериозно нарушена, додавајќи дека демонстрантите се „измамници и лажговци“. „Ако државата почне да го спроведува законот, тогаш тие викаат дека тоа е терор. Замислете ветеран роден 1985 година – во која војна учествувал тој?“, изјави тој, алудирајќи на политичките пароли што се појавуваат на протестите.
Според претседателот, политичките мотиви зад демонстрациите сè повеќе излегуваат на површина. „Нивните барања стануваат сè поочигледни и луѓето веќе ја разбираат деструктивната улога што тие ја имаат“, порача Вучиќ.
