Долги години Македонија е претендент да стане членка на Европската Унија, а не само што сме далеку од земјите членки на ЕУ туку полека, но сигурно го губиме и чекорот со оние во Африка.
Во екот на големата криза со лични документи и криза со пасоши (која трае веќе со години), одличен пример за организираност во аплицирањето и издавањето ни доаѓа од Нигерија.
Владата на оваа земја уште пред децении формираше служба за имиграција, а преку веб страната на истата може да се аплицира електронски за пасош, виза, сертификат за патување и резидентна картичка.
Целата постапка за аплицирање може да се изврши електронски. Се пополнува формулар, се прикачува фотографија, а во последната фаза треба само да се посети канцеларија со цел биометриска проверка. Тоа е и последниот чекор кој е различен во зависност од тоа дали се наоѓате во Нигерија или аплицирате од странство.
Доколку се наоѓате на територијата на Нигерија потребно е само да посетите една од канцелариите, а доколку се наоѓате во странство задолжителна е посета на Амбасада или канцеларија за врски.
Преку сервисот може да се поднесе барање за корекција на податок. Во тој случај не треба да се посетува физички некоја институција. Се поднесува барањето, а пасошот пристигнува на домашна адреса.
Секако, постои и опција за следење на статусот на секоја апликација, а исто така може да се аплицира и за нигериско државјанство, прикачувајќи ги потребните документи на сервисот.
Време е да научиме нешто и од Африка.
