Семејствата на жртвите од пожарот во кочанската дискотека „Пулс“ ќе организираат протестен марш под името „Марш за ангелите“, кој ќе се одржи утре во Скопје. Маршот ќе започне во 12:05 часот, симболично за одложената реакција на институциите.
Според најавите, маршот ќе започне пред Обвинителството во Скопје, ќе продолжи преку Градскиот плоштад и ќе заврши пред Собранието на Република Македонија.
„Ние заслужуваме одговори. Ние не сме правни експерти и не разбираме како во правниот систем може да се случува притвор и потоа ослободување без јасно образложение. Се чувствуваме како да сме на работ на тотално губење на довербата во институциите. Како може да се создава таква правна ситуација во која не разбираме ни сами за што се води постапката?“ – се вели во писменото соопштение на семејствата.
Протестот има за цел да поттикне институциите на построга одговорност и транспарентност во процесот на истрага.
