Европските активисти бараат реформи кои би можеле да ја ограничат идната продажба на големи теренски возила во Европската унија. Недавните истражувања покажуваат дека растечката популарност на овие автомобили не само што ја отежнува мобилноста во градовите, туку и негативно влијае на безбедноста на пешаците.
Во последната деценија, SUV моделите добиваат на популарност во Европа, иако порано беа поврзани главно со американските патишта. Овие автомобили се импресивни по големина, нудат многу простор за товар и им даваат на возачите чувство на удобност и безбедност. Сепак, бројни организации предупредуваат дека, и покрај овие предности, големите автомобили носат сериозни ризици, особено за јавната безбедност. Недавен извештај покажува дека просечната ширина на новите автомобили кои се продаваат во Европа се зголемува за еден сантиметар на секои две години, достигнувајќи моментално помеѓу 170 и 180 см, што е 11 сантиметри повеќе од 2001. година. Активистите предупредуваат дека ако европските држави не го решат проблемот со гломазните автомобили, на улиците ќе останат само „мали автобуси“.
Но, тоа не е единствената причина за загриженост. Долгите, широки и тешки автомобили, како современите SUV-ови, претставуваат многу поголема закана за пешаците. Ова го потврдува и студијата на Европскиот совет за безбедност на сообраќајот од минатата година. Според мислењето на стручњаците, при брзини поголеми од 64 километри на час, стапката на смртност на пешаците кои ќе бидат удрени од класичен патнички автомобил е загрижувачки 53%, додека кај SUV-овите таа може да достигне и до 100%. Исто така, тие нагласуваат дека тешките возила трошеат несразмерно повеќе гориво од традиционалните автомобили и се познати како поголеми загадувачи на животната средина. Поради нивната големина, тие се помалку предвидливи на патот, што го зголемува ризикот во градскиот сообраќај.
Европскиот парламент веќе најави одговор на алармантните сигнали од стручњаците и изјави дека ќе преземе мерки за намалување на бројот на SUV-ови и теренци на европските патишта. Според пишувањата на бројни медиуми, првите чекори во таа насока веќе ги презеле Франција, Холандија и Белгија. Париз и Брисел разгледуваат воведување дополнителни паркинг такси за поголеми и потешки возила, додека Амстердам веќе подолго време забрани влез на теренци во централните делови на градот.
