Ауди соопшти дека во првиот квартал од 2025 година остварил раст на приходите од 12,4 отсто на годишно ниво, достигнувајќи 15,4 милијарди евра. Оперативниот профит се зголемил за 15 проценти, достигнувајќи 537 милиони евра, објави Танјуг.
Компанијата, која е дел од групацијата Фолксваген, ги потврди своите претходни проекции за заработка за целата фискална година, но предупреди дека тие не го вклучуваат можниот ефект од американските увозни давачки, чии последици, како што се наведува, сè уште не можат да се проценат.
Според официјалната прогноза, Ауди очекува годишни приходи меѓу 67,5 и 72,5 милијарди евра, оперативна профитна маргина помеѓу 7 и 9 проценти и нето паричен тек меѓу 3 и 4 милијарди евра.
Во овие проекции не се вклучени ниту можните последици од мартовскиот договор со синдикатите, кој предвидува намалување на бројот на вработени.
Вкупната испорака на возила од Ауди во првиот квартал од 2025 година е намалена за 3,4 проценти на годишно ниво, на 383.401 возило. Но, сегментот на електрични возила на батерии (BEV) бележи значителен раст од над 30 проценти.
Испораките во Кина се намалени за 7 отсто, во Европа за 3 проценти, а во Северна Америка за 2,1 отсто. Од друга страна, домашниот германски пазар забележал раст од 4,8 проценти.
Компанијата и понатаму се опоравува од слабите продажни резултати во претходните години и го забрзува преминот кон електрични возила.
„Нашите клучни бројки за првиот квартал јасно покажуваат дека мора да продолжиме да ја подобруваме нашата ефикасност и конкурентност. Затоа, со полна сила продолжуваме со трансформацијата на Ауди“, изјави финансискиот директор Јирген Ритерсбергер.
Од друга страна, БМВ во првиот квартал од 2025 година бележи пад на профитот од 26,4 проценти на годишно ниво, достигнувајќи 2,2 милијарди евра, главно поради нагло намалување на продажбата во Кина.
Германскиот производител на автомобили соопшти дека во овој период остварил приход од 33,8 милијарди евра, што претставува пад од 7,8 отсто во однос на претходната година, пренесува „Виршафтсвохе“.
БМВ во првото тримесечје продал 586.000 возила, што е за 1,4 проценти помалку во споредба со истиот период лани. Компанијата се соочува со силна конкуренција од домашните кинески брендови, што негативно влијае врз продажбата на сите европски производители.
