Москва, 6 февруари 2025 (МИА) – Портпаролката на руското Министерство за надворешни работи, Марија Захарова денеска изјави дека ако ЕУ воведе ограничување за руските дипломати, Москва пропорционално ќе одговори.
Таа наведе дека во западните медиуми се објавува за желбата на голем број земји од Европска Унија да вклучат ограничувања на слободата на движење и должината на престојот на руските дипломати во следниот пакет антируски санкции што ги подготвува Унијата.
Според неа, Русија многу сериозно ги сфаќа ваквите најави.
– Гарантираме дека во случај на имплементација на гореспоменатите деструктивни планови, одмаздничките мерки нема да чекаат долго, истакна Захарова.
Таа предупреди дека ќе бидат воведени „пропорционални ограничувања“ за европските дипломати во Русија.
Од Марина Илиевска/МИА
