Денеска започна тридневната саемска манифестација 8 – ми Меѓународен саем на органски и традиционални производи “Органска трпеза” и 4 – ти Меѓународен саем за земјоделство, технологии, храна и преработка “Агромак”. Овој традиционален настан е во организација на Здружение за развој на земјоделството и заштита на животната средина „ЖИВОТ“ – Комора на органски производители на Македонија – КОП – Компанија АДУТ ГВН, Куманово, годинава со држава – партнер Република Србија. Покровители се Општина Куманово преку Програма на Одделението за стратешко планирање, креирање политики, следење и локален економски развој – ЛЕР и Министерството за земјоделство, шумарство и водостопанство на Република Северна Македонија.
Покрај гастрономската манифестација „Дојди ми на трпеза” со традиционална подготовка на храна и натпреварувачки карактер, оваа година ќе се одржи и натпревар во готвење на отворен оган, во соработка со Асоцијацијата на шефови готвачи на Србија и Кулинарската федерација на Србија. Љубителите на животни по трет пат ќе имаат можност да ја видат ревијалната изложба на домашни миленици и украсна живина.
Саемите претставуваат можност за промоција на органски и традиционални производи, презентација на модерни земјоделски технологии и иновации, поврзување со нови бизнис партнери, вмрежување и размена на искуства.
Саемската манифестација ја посетија амбасадори, претставници на министерства, општини, државни институции и комори во РСМ, Србија, Црна Гора, Косово и на бизнис секторот.
Пред присутните гости се обрати претседателката на Совет на Општина Куманово, која потенцираше дека Куманово е центар на економски и земјоделски развој, со изградена мрежа на партнерства, што се темелат на професионализам, за кое значаен удел имаат саемски манифестации од ваков вид.
Извор:kumanovo.gov.mk
