Судењето за трагичниот пожар во дискотеката „Пулс“ во Кочани, во кој животот го загубија 63 лица, денеска и официјално започна со воведно обраќање на претседателката на судечкиот совет, судијката Диана Груевска Илиевска. Таа нагласи дека процесот ќе биде долг и комплексен, но ќе се води транспарентно и без прекини.
„Не можеме да ви гарантираме брзина, но ќе направиме сѐ постапката да се одвива непречено. Не знаеме колку ќе трае – можеби пет месеци, можеби пет години“, изјави судијката, повикувајќи на дисциплина и почитување на судот. Таа додаде дека секој обвинет ќе има можност во целост да ја изнесе својата одбрана и дека „правдата ќе биде достижна“.
Судијскиот совет го сочинуваат Груевска Илиевска и судијата Ахмет Идризи, а присутен е и резервен поротник за да се обезбеди непречено водење на процесот. По прозивката на сите 34 обвинети и нивните адвокати, судот донесе одлука случајот „Кочани“ да се спои со постапката против сопственикот на агенцијата за обезбедување „Рубикон“, Александар Нацев. Одлуката е донесена поради „економичност на постапката“, а против неа не е дозволена жалба.
Заседанието го следат повеќе од 50 родители на загинатите, како и голем број домашни и меѓународни медиуми, меѓу кои БМТ, ТРТ, Франспрес, Ројтерс, Асошиејтед прес и Андалузија.
Меѓу обвинетите е и поранешниот градоначалник на Кочани, Николче Илиев, кој ќе биде бранет од тим од пет адвокати по обвинението за тешки дела против безбедноста.
