Верховниот лидер на Иран, Али Хамнеи, на социјалната платформа X, објави честитки за Иран, тврдејќи дека Иранската Исламска Република постигнала значајна победа над „лажниот ционистички режим“ и над Соединетите Американски Држави. Според Хамнеи, САД влегле во војна за да го спасат Израел од целосно уништување, но, како што вели, не постигнале ништо, додека Иран ја постигнал победата.
„Чувствувам потреба да испратам неколку честитки на големата нација Иран. Прво, честитки за победата над лажниот ционистички режим. И покрај целата негова пропаганда и тврдења, ционистичкиот режим речиси се распадна и беше уништен под ударите на Исламската Република“, напиша Хамнеи во својот прв пост.
Во следниот пост, Хамнеи ја честиташе Иран за победата и над американскиот режим: „Американскиот режим влезе во директна војна затоа што веруваше дека ако не го стори тоа, ционистичкиот режим ќе биде целосно уништен. Но, не доби ништо од таа војна. И тука, Исламската Република победи и за возврат ѝ зададе силна шлаканица на Америка“.
Хамнеи не даваше јавни изјави со денови, што предизвика загриженост меѓу иранските власти и јавноста, особено во контекст на конфликтот со Израел кој беше привремено прекинат со прекин на огнот. Некои извори шпекулираа дека Хамнеи бил префрлен на непозната локација по избувнувањето на конфликтот на 13 јуни, за да го заштитат од можен напад од израелските безбедносни служби, и дека дури и по прогласувањето на прекинот на огнот, тој останал на скриена локација.
Кога беше прашан за неговото отсуство, неговиот близок соработник и раководител на архивата на Врховниот лидер, Мехди Фазели, изјави дека „луѓето одговорни за безбедноста на Врховниот лидер си ја вршат работата добро“, додавајќи дека „со Божја волја, народот наскоро ќе ја прослави победата заедно со својот лидер“.
