Димитар Апасиев, претседателот на Левица, вечерва објави дека неговата партија се позиционира како нов лидер на опозицијата во Македонија. Според него, кандидатот за градоначалник на Скопје, Амар Мециновиќ, успеа да се квалификува за вториот изборен круг, а Левица забележа значителен успех со освојување на над 70 советнички места низ целата држава. Апасиев изјави: “Левица е вистинскиот лидер на опозицијата. Планот за пасокизација на СДСМ се оствари. За Орце имам порака – не бегај од дебата!”.
Во својата анализа, Апасиев истакна дека Левица освои второ место пред СДСМ во неколку општини во Скопје, вклучувајќи Аеродром, Карпош, Кисела Вода, Гази Баба, Бутел и Чаир, како и во Велес. Кандидатот за градоначалник, Мециновиќ, се заблагодари за поддршката и нагласи дека за првпат во историјата на Скопје, во вториот круг влегува кандидат кој не е поддржан од ниту една од двете најголеми партии.
“Денеска Левица испиша историја. Покажавме дека има надеж, а во вториот круг ќе ја претвориме во реалност. Илјадници скопјани се охрабрија да гласаат за промена и сакаат град за кој ќе се грижат вистински луѓе. Се соочуваме со две визии – едната, застарена и корумпирана, и нашата – визија од љубов кон Скопје”, изјави Мециновиќ.
Тој исто така нагласи дека ова е само првото полувреме од борбата за главниот град и најави интензивирање на кампањата во вториот круг. “Го дочекавме денот кога ВМРО и СДСМ нема да ни бидат судбина. Ги повикуваме сите разочарани да ни се придружат, затоа што ова е наша борба и наша приказна за нашето Скопје”, додаде Мециновиќ.
