Во засилените сообраќајни контроли спроведени на 5 февруари, полицијата регистрираше серија сериозни прекршоци низ повеќе градови во земјата, при што 11 лица биле лишени од слобода поради управување возило без возачка дозвола или со активна забрана, а повеќе автомобили се одземени.
Контролите биле спроведени од единиците на Министерство за внатрешни работи на различни локации, а меѓу приведените има и малолетници.
На улицата „Таше Милошевски“ во Ресен, полицијата го запрела 27-годишниот Д.К., кој управувал автомобил без положен возачки испит. Подоцна, на патот Ресен–село Евла, бил затекнат и 15-годишник зад волан, кој исто така немал право на управување. Во двата случаи возилата биле одземени.
Кај селото Ропотово, на делницата Прилеп–Македонски Брод, полицијата го лишила од слобода 28-годишен возач од општина Долнени, кој управувал „голф“ без возачка дозвола.
На магистралниот пат Гостивар–Стража, 24-годишник од Чегране бил фатен без положен возачки испит, додека во Скопје, на кеј „Димитар Влахов“, приведен бил 23-годишен возач кој управувал автомобил без важечка дозвола.
Во регионот на Струмица, полицијата евидентирала неколку случаи: 19-годишник, 17-годишник и 33-годишен возач управувале возила без дозвола. Возилата и документите им биле одземени по насоки на јавен обвинител.
Во Кавадарци, двајца возачи биле приведени поради управување без положен испит, а во Струга бил затекнат 32-годишник кој возел и покрај активна забрана.
Од полицијата информираат дека по целосно документирање на случаите, против сите лица ќе бидат поднесени соодветни кривични или прекршочни пријави.
Надлежните апелираат до граѓаните да не седнуваат зад волан без законски услови, бидејќи ваквите постапки претставуваат сериозна опасност за сите учесници во сообраќајот.
