На неодамнешниот саем на автомобили во Минхен, BMW ја претстави својата нова електрична платформа Neue Klasse. Сепак, компанијата не планира да се откаже од својата традиција на производство на возила со мотори со внатрешно согорување. Директорот за продажба на BMW, Јохен Голер, јасно одговори на прашањето дали компанијата ќе престане со производството на бензински и дизел мотори: “Никогаш”.
Европската унија одлучи дека по 2035. година, новите бензински и дизел возила, вклучувајќи и хибридите, нема да се продаваат во земјите членки. Во меѓувреме, кинеските производители на автомобили се во значителна предност во однос на европските, особено кога станува збор за цените на новите електрични возила. Минатата недела, Европската асоцијација на производители на автомобили (ACEA) одржа итен состанок со претседателката на Европската комисија, Урсула фон дер Лајен, на кој една од темите беше барањето на автомобилската индустрија за продолжување на рокот за продажба на возила со мотори со внатрешно согорување и по 2035. година. Многу аналитичари веруваат дека обидите на автомобилската индустрија ќе бидат безуспешни.
BMW планира да произведе нова генерација на бензински и дизел автомобили кои ќе бидат достапни во источна Европа, Индија и во земји каде електрификацијата сè уште не е развиена. На тој начин, компанијата ќе продолжи со производството и по 2035. година.
