Интервју со Бојан Мишкоски, носител на советничка листа за Општина Кичево од редовите на политичката партија Левица.
1. Господин Бојан Мишкоски, Вие сте носител на советничката листа на Левица во Кичево. Што Ве мотивираше да влезете во политиката?
БМ: Отсекогаш ме интересирала политиката, морам да признаам повеќе глобалната од локалната. Но за да влезеш во политика и да направиш промена мора пред се да делуваш локално. А да бидам искрен, Кичево е место каде очајно треба сериозна промена во политичкото фунцкионирање и делување. Па поведен од својата желба да се направи разлика и реална промена на она што се нуди на кичевчани прифатив да бидам дел од советничката листа на Левица Кичево а воедно и носител, како политичка партија која е најблиску до моите убедувања и сфаќања за тоа како треба да делува политиката и како да дејствуваат политичарите.
2. Како би се опишале себеси надвор од политиката, што Ве дефинира како личност?
БМ: Отворена позитивна личност, со уметничка душа. Ја сакам и живеам музиката секојдневно и преку моето хоби Dj-ство и уживам да откривам нова музика без разлика на жанр, уживам во природа и кога сум во можност планинарам. И најбитното, живеам за семејството, сум посветен сопруг и татко, кој ја гледа политиката како начин да остави подобар свет за своето дете.
3. Кои се трите најгорливи проблеми со кои се соочува Кичево во моментов?
БМ: Дивите депонии кои ги има Кичево на секој чекор, вклучувајќи ја и градската, која се наоѓа во централното градско подрачје. Проблемот со кучињата скитници, кој од ден на ден е се поголем, со голем број на повредени кичевчани од истите. Немањето на конкретни решенија за задржувањена младите во Кичево и неможноста на институциите соодветно да одговорат на потребите на едно семејство и нивните деца преку достапност на квалитетни предшколски установи, училишта како и спортски, културни и уметнички центри кои ќе помогнат во правилно развивање на младите.
4. Што конкретно нудите како решение и дали имате подготвен план за тоа?
БМ: Секако дека како дел од нашата програма којае достапна во дигитална форма ги имаме опфатено скоро сите проблеми со кои се соочува Кичево и за истите имаме предлог решенија и проекти кои се во подготовка и истите би биле претставени пред советот на град Кичево. Свесни сме дека имаме голема програма каде за реализација на истата е потребно долг периоди поддршка од советот и градоначалникот на Општина Кичево. Но спремни сме засоработка, затоа што нашата цел е Кичево да добие нов лик, каде со напорна работа на долгорочни проекти и стратегии за развој ќе направиме место каде кичевчани ќе сакаат да живеат.
5. Што Ве разликува од останатите листи и партии кои учествуваат на изборите?
БМ: Советничката листа на ЛО Левица Кичево е составена од чесни кичевчани кои си го сакаат својот град и сакаат да видат подобро утре за себе и своите поколенија. Она што нас не натера да се впуштиме во оваа битка за советнички места е токму желбата да се покаже дека може да се направи промена на подобро а не Кичево да се уништува, обезличува и да се користи за сопствени лукративни цели. Фокусот во Левица секогаш бил насочен кон работникот и кон обичниот граѓанин и обезбедувањето на подобро утре за нив е она што насне прави поразлични од нашите противници.
6. Како ќе обезбедите транспарентност во Вашето работење како советник?
БМ: Левица како партија која веќе е застапена во многу општини во Македонија, до сега докажа дека транспарентноста на работата на советот во целост им е на прво место. По избирањето на советници кои беа предложени од страна на Левица во другите градови, едно од првите барања и решенија за транспарентно работење беше јавниот пренос на седниците на советите со цел што повеќе граѓани да имаат директен увид во работата на советот. Ние како и нашите сопартици, ова решение, ќе го поднесеме веднаш до Советот на Град Кичево и за истото сме сигурни дека ќе успееме да го реализираме во најкус можен рок.
7. Која е Вашата порака до граѓаните на Кичево?
БМ: Кичево заслужува да излезе од матрицата на досегашните„владетели” кои освен политичката и финансиската моќ која ја добиваат како избраници на народот не ги интересираат реалните проблеми кои ги имаат кичевчани.
Редно време е дасе направи промена и заедно да создадеме едно ново Кичево. Кичево од кое кичевчани нема да сакаат да се иселат, туку ќе сакаат тука да живеат, да останат, да остават свои поколенија и да дадат допринос во кичевското секојдневие.
Редно време е властаи силата за одлучување за иднината за Кичево да се даде на младите и некорумпирани кадри, кои имаат само една цел, а тоа е подобро Кичево за сите.
