Бугарски европратеник од редовите на владејачката партија ГЕРБ се обидува преку амандман да го редефинира македонскиот идентитет и јазик во европски документ, алармираше денеска премиерот Христијан Мицкоски.
Амандманот има за цел да го дефинира македонскиот идентитет како „сегашен“ („present“), за разлика од формулацијата во извештајот на известителот за Македонија, европратеникот Томас Вајц, кој го признава македонскиот идентитет како историски и „многувековен“.
„Жалам што пратеници од нашиот источен сосед настапуваат со реторика што не води кон соработка и европски дух, туку не враќа во времето на живковизмот“, изјави премиерот Мицкоски.
Тој додаде дека Македонија нема да одговори со конфронтативна реторика, туку ќе остане доследна на принципите на добрососедски односи и европски вредности. „Ќе изразиме жалење и ќе се повикаме на европската пракса на взаемна почит“, рече премиерот.
Мицкоски предупреди дека политиките кои ја негираат македонската историја и идентитет и понатаму се присутни во дел од политичките кругови во Бугарија. „Обидот за дефинирање на идентитетот како нешто сегашно е директен атак врз историското постоење на македонскиот народ. За жал, ова покажува дека живковизмот е сè уште жива политичка филозофија во Софија“, изјави тој.
Амандманот треба да биде разгледан во рамки на Европскиот парламент при усвојување на извештајот за напредокот на Северна Македонија. Македонската влада најави дека внимателно ќе го следи процесот и ќе реагира дипломатски доколку тоа биде неопходно.
