Граѓанската иницијатива Стоп за Усје повторно излегува на улица, револтирана од, како што велат, долгогодишното загадување и молкот на надлежните институции.
Од иницијативата најавуваат граѓанска блокада во среда, 21 јануари, со почеток во 18 часот, која ќе се одржи на раскрсницата меѓу булеварите Борис Трајковски и Србија во Скопје, во правец кон населбата Усје.
„Затоа што воздухот нема да се исчисти сам! Дојди на блокада!“, порачуваат од иницијативата, потенцирајќи дека протестот е израз на граѓански отпор против континуираното загадување кое, според нив, директно го загрозува здравјето на жителите.
Ова не е прв ваков протест. Слични блокади и јавни собири се одржуваа и минатата година, но граѓаните велат дека состојбата останува непроменета. Нивното основно барање е итно запирање на загадувањето и преземање конкретни мерки против индустрискиот извор што, според нив, со години го труе градот – Цементарница Усје.
Од „Стоп за Усје“ порачуваат дека ќе продолжат со притисокот сè додека институциите не почнат реално да постапуваат, наместо, како што велат, само декларативно да зборуваат за заштита на животната средина.
