Зоран Јованов, таткото на Васил, денеска се појави пред Основниот кривичен суд во Скопје, каде изрази уверување дека не е виновен за обвинението што му се става на товар. Тој е обвинет за „загрозување на безбедноста на сообраќајот со опасно дејствие или средства“, по трагичниот инцидент во кој неговиот син, управувајќи автомобил без дозвола и под дејство на алкохол, усмрти пешак.
Обвинителот Александар Марковски изнесе тврдење дека Јованов, преку родителска попустливост, придонел за создавање на опасната ситуација. „Во случајот станува збор за еден ноторен факт – татковата љубов спрема синот единец била голема, но резултирала со несреќна пропустливост на родителот кон синот кој што се оддал и на пороци“, рече обвинителот. Тој нагласи дека обвинителството ќе докаже дека таткото бил клучен фактор во генерирањето на опасната состојба.
Адвокатот Сашко Дуковски, кој го застапува Јованов, го оцени обвинението како правно неосновано и најави дека ќе бара детално образложение за секој поднесен доказ. „Се работи за правен преседан незабележан во македонската правна историја – да го товарите таткото за дејствија кои ги сторил неговиот полнолетен син“, изјави Дуковски, додавајќи дека ќе бара правна релевантност за секој доказ.
На почетокот на денешното рочиште, Тодор Кулаков, таткото на Фросина Кулаков, упати прашања кон судечкиот совет, барајќи од судијката Снежана Марковска да се изземе од предметот. „Редно е да се иземете од овој предмет, ова е наместено“, рече Кулаков, по што беше отстранет од судницата. Адвокатот Дуковски реагираше дека ќе го напушти судењето доколку Кулаков повторно му се обрати директно.
Обвинителството го измени обвинителниот предлог, кој првично беше „предизвикување општа опасност“, по новоприбавени докази. Обвинителниот предлог против Зоран Јованов следува откако неговиот син, Васил, во јануари годинава, управувајќи автомобил без возачка дозвола и под дејство на алкохол, удри во пешакот Фросина Кулакова, која почина на самото место.
