Основниот суд во Кавадарци му изрече доживотна казна затвор на 43-годишниот С. И. од Кавадарци, кој беше прогласен за виновен за убиството на својот помлад брат, извршено на денот на роденденот на жртвата. Обвинетиот ја признал вината, по што Кривичниот совет му ја изрече најстрогата казна предвидена со закон – доживотен затвор.
Осудениот ќе остане во притвор до започнувањето на издржувањето на затворската казна. Против пресудата е дозволена жалба во законски предвидениот рок.
С. И. е огласен за виновен за кривично дело Убиство, согласно член 123 став 2 точка 4 од Кривичниот законик, кое опфаќа лишување од живот од користољубие, безобѕирна одмазда или други ниски побуди, за што е предвидена најтешката казна – доживотен затвор.
Според обвинението, на 27 јули годинава, мотивиран од користољубие, обвинетиот го лишил од живот својот помлад брат И. И. (42), со кого живеел во исто домаќинство. Инцидентот се случил по вербална расправија, откако обвинетиот се посомневал дека брат му има намера да го присвои целиот имот.
Во налет на гнев, С. И. го удрил братот по главата со тапиот метален дел од тесла. Откако жртвата паднала на подот, обвинетиот му задал уште два удари со истото орудие, нанесувајќи му смртоносни повреди на самото место.
По убиството, обвинетиот го напуштил домот, а наредниот ден повторно се вратил и телото го пренел во бањата. Во следните денови, со цел да го прикрие злосторството, тој во повеќе наврати се враќал во куќата, ја чистел крвта од подот и предметите, по што телото го преместил во шупа во дворот, каде што го закопал во ископан ров и го покрил со шперплоча и други предмети.
Во периодот од 30 јули до 5 август, кога телото било откриено, обвинетиот во повеќе наврати подигал пари користејќи ја банкарската картичка на жртвата.
Исчезнувањето на И. И. било пријавено во СВР Кавадарци од страна на неговата сестра, која неколку дена безуспешно се обидувала да стапи во контакт со него. Истот ден, таа и нејзиниот сопруг забележале свеж ископ со растресита земја во помошен објект во дворот на семејната куќа, што предизвикало сомнеж дека исчезнатиот е закопан на тоа место.
