Од Министерство за внатрешни работи алармираат дека во изминатиот период е регистрирано зголемување на фишинг напади, при што граѓаните се таргетираат преку лажни СМС пораки, електронска пошта, веб-страници и пораки на социјалните мрежи.
Според МВР, пораките најчесто се маскирани како известувања од банки, државни институции, поштенски служби или реномирани компании, со цел да се создаде лажно чувство на доверба. Крајната цел е измама на корисниците и прибирање на нивните лични или финансиски податоци.
Како најчест облик на измама се издвојуваат лажните СМС пораки за наводно пристигнати пратки од пошта, во кои примателите се повикуваат да кликнат на линк и да внесат лични податоци. Со посетување на овие лажни веб-страници, корисниците несвесно ги изложуваат своите податоци на злоупотреба, што може да резултира со финансиска штета или кражба на идентитет.
Од Секторот за компјутерски криминал информираат дека во текот на изминатата година се примени над 50 пријави поврзани со ваков тип на измами, а истрагите за откривање на сторителите се во тек.
Надлежните институции упатуваат апел до граѓаните да бидат исклучително внимателни при користење на интернет и дигитални услуги. Се препорачува да не се отвораат сомнителни линкови и пораки, никогаш да не се споделуваат податоци од банкарски картички, лозинки или лични идентификатори, како и секогаш да се проверува адресата на испраќачот – официјалните институции користат службени домени.
Дополнително, се советува користење на двофакторска автентикација (2FA) за поголема заштита на корисничките сметки и итно пријавување на сомнителни пораки кај надлежните институции или во банките.
Од МВР порачуваат дека активностите за откривање и санкционирање на кибер-измамите продолжуваат, а граѓаните се клучниот фактор во спречувањето на вакви злоупотреби преку внимателно и одговорно однесување во дигиталниот простор.
