Жената која денеска беше тешко повредена во сообраќајна несреќа на улицата „Народен фронт“ во централното градско подрачје на Скопје, им подлегна на повредите, потврдија од Ургентниот центар каде што беше хоспитализирана по инцидентот.
Несреќата се случила во близина на трговскиот центар „Зебра“, кога возило удрило пешак – жена на возраст од околу 75 години – по што возачот го напуштил местото на настанот без да укаже помош. Министерството за внатрешни работи информира дека интензивно се трага по сторителот.
На местото на несреќата и неколку часа по настанот биле видливи траги од ударот, меѓу кои и крв на коловозот, како и скршен ретровизор, за кој се претпоставува дека припаѓа на возилото што учествувало во несреќата. Полициски екипи продолжуваат со увид и собирање докази со цел целосно расветлување на случајот.
