Основниот суд во Кавадарци изрече казна затвор од една година за 46-годишен жител на градот, кој намерно удрил полициски службеник со возило при обид за негово легитимирање.
Како што информира Основното јавно обвинителство Кавадарци, инцидентот се случил на 21 декември по полноќ, кога обвинетиот, управувајќи патничко возило марка „Фолксваген“, не запрел на знак даден од полициски службеници. Откако бил опколен од две полициски возила на една од градските крстосници, тој со возилото се залетал кон полицаец кој излегол од службеното возило со цел да изврши легитимирање.
„Осомничениот со голема брзина го удрил полицискиот службеник во пределот на стомакот и левата нога, по што удрил и во службеното возило и продолжил да се движи“, соопштуваат од Обвинителството. Полицаецот при ударот се здобил со повеќе телесни повреди.
Против кавадарчанецот беше поднесен обвинителен предлог за кривично дело „Напад врз службено лице при вршење работи на безбедноста“ од член 382 став 2 во врска со став 1 од Кривичниот законик. Тој беше лишен од слобода на 25 декември, а веќе наредниот ден изведен пред суд, каде го признал делото.
Судот го огласи за виновен и му изрече казна затвор од една година, а до правосилноста на пресудата му определи мерка притвор поради опасност од бегство и можноста за повторување на делото.
