Скопје, 1 март 2024 (МИА) – Фудбалската федерација на Македонија (ФФМ) официјално ги заврши активностите за поставување и одржување на новата тревна подлога на Националната арена „Тодор Проески“ во Скопје и објектот со новиот хибриден терен денеска го предаде на употреба на Акционерското друштво за изградба и стопанисување со станбен и деловен простор (АДИССДП).
Како што е соопштено попладнево, ФФМ целосно го обнови тревникот на Арената со поставување најсовремена и хибридна површина, а новата подлога ја спојува природната трева со најсовремените синтетички материјали, притоа обезбедувајќи одлична издржливост и еластичност.
Со поставувањето на хибридната трева од најновата генерација на Националната арена и со целосно нов систем за наводнување се овозможува на најголемиот стадион во државата да се одигруваат натпревари во текот на целата година, без оглед на временските услови, притоа одржувајќи ги највисоките стандарди за игра.
„Оваа инвестиција ја нагласува нашата посветеност на обезбедување највисоки услови за одигрување на репрезентативни и клупски натпревари и повторно ја враќа нашата Национална арена како врвно место за фудбал на сите нивоа. Ја изразуваме нашата благодарност до сите кои беа вклучени во реализацијата на овој проект, посебно на АДИССДП и со нетрпение очекуваме да им посакаме добредојде на фудбалерите на Националната арена.“, изјави претседателот на ФФМ, Муамед Сејдини.
Средствата за новата подлога на Националната арена целосно ги обезбеди ФФМ преку „Хет – Трик“ проектот на УЕФА за фудбалска инфраструктура.
Од: Емил Гашевски Извор: МИА
