Претседателот на СДСМ, Венко Филипче, изрази загриженост за актуелната политичка ситуација во Македонија, посочувајќи дека ВМРО-ДПМНЕ, по доаѓањето на власт, не само што не ги исполни своите ветувања за подобри преговарачки позиции, туку и фактички ги запре преговорите со Европската унија. „Добро е да знаеме на што сме. Ветуваа подобри преговарачки позиции, а не спомнаа дека преговорите ќе запрат. Сега практично се запрени, ништо не се случува“, изјави Филипче.
Според него, Владата не покажува иницијатива за спроведување на реформската агенда, ниту за носење на реформски закони во Парламентот. „Не гледаме дека нешто се трудат околу тоа да направат, нема дипломатска активност на таа тема“, додаде тој. Филипче истакна дека е очигледно оти актуелната власт е конзистентна во својата намера да не дозволи напредок во преговорите со ЕУ. „Ќе се бориме поради тоа што е единствената иднина за нашата земја и ќе ставиме на масата“, нагласи Филипче.
По посетата на ОУ „Киро Глигоров“ во општина Центар, Филипче најави дека ќе се разгледа документот за Резолуцијата оваа недела и ќе се разговара за следните чекори. „Ако има чесен пристап од страна на власта, ќе седнат и ќе разговараат, дали на лидерска средба, дали во Парламентот“, рече тој.
Филипче истакна дека се работи на детална Резолуција која ќе биде презентирана пред јавноста и политичките партии. „Нека знаат граѓаните кој е за Европа, а кој не е“, додаде тој, нагласувајќи дека не се распродадени македонските национални интереси.
Во однос на економските политики, Филипче критикуваше дека Владата не ги контролира цените и дека платите не растат. „Гледаме катастрофални политики, политики на негрижа кон граѓаните, на секое ниво“, заклучи Филипче, посакувајќи успешна учебна година на наставниците, учениците и нивните семејства.
