Претседателот на СДСМ, Венко Филипче, вечерва одржа трибина во Делчево, каде што остро ја критикуваше актуелната влада, оценувајќи ја како лицемерна и без конкретни проекти за фалење. „Нејзината безидејност е покриена со нереални проекти и ветувања на граѓаните пред избори, лагите и ПР манипулациите испливаа на површина“, истакна Филипче.
Тој продолжи со критиките, нагласувајќи дека следуваат само изговори и оправдувања за катастрофално лошите перформанси на власта. „Но нема бегање од вистината, а таа е дека оваа влада нема резултати, не планира да ги исполни ветувањата кон граѓаните и не планира да работи за граѓаните. Оваа власт е далеку од народот. Арогантна и изгубена во своите кабинети, додека семејствата бројат денови до следната плата и ги кратат основните трошоци“, рече Филипче.
Според него, додека народот чека повисоки плати, власта се расфрла со јавни средства. „Тие живеат во ПР, со нарачани анкети, а ние живееме во реалност. Реалност е дека додека народот чека повисоки плати, тие јадат манго и папаја, купуваат вина по институции, летаат со приватни авиони, додека платите мируваат и инфлацијата ја јаде секоја заработена пара“, додаде тој.
Филипче повика на активност и обединување, нагласувајќи дека ова не е време за апатија. „Ова е време кога граѓаните мора да донесат одлука. Дали да останат пасивни и да гледаат како она што со децении сме го граделе полека се распаѓа, или да застанат и го заштитат најважното, иднината на семејства, достоинството на држава и гласот на секој граѓанин“, рече тој.
„Затоа е потребно обединување за силен СДСМ. Силен СДСМ е единствената надеж дека Македонија ќе биде правична, човечна и демократска држава со јасна перспектива. Затоа да извлечеме поука од минатото и да се здружиме околу борбата за вредности, за нашите идеали, за да ја исправиме партијата на нозе за да им служи на граѓаните. Се бориме за чесност, за отчет и за работа што се гледа“, заклучи Филипче во Делчево.
