На неодамнешната граѓанска трибина „Се бориме за нашиот дом” во Кисела Вода, д-р Венко Филипче, претседател на Социјалдемократскиот сојуз на Македонија, изрази загриженост за актуелната состојба во општината и Скопје. Тој истакна дека Кисела Вода е запуштена, а ѓубрето во Расадник е видливо и од Центар. „Парковите се полни со смет и го слушам градоначалникот Орце, кој сега е кандидат за градоначалник на Скопје, како вели дека ќе го исчисти Скопје за 72 часа. Па зошто не исчистиш Кисела Вода, Орце? Што правеше до сега?” праша Филипче.
Според него, кампањата на ВМРО-ДПМНЕ за овие избори е само реприза на онаа од 2021 година, полна со „мега лаги” и неисполнети проекти. „Истите лаги, и пред 4 години, и лани, и сега, кампањата од нивниот штаб е едноставно реприза. Мега лаги. Нешто друго,” додаде тој. Филипче не штедеше критики и за кандидатот на ВМРО-ДПМНЕ, велејќи дека „човекот кој самиот вели дека за него Мицкоски е бог, последното нешто што на Скопје му треба е партиски послушник кој ќе ги спроведува неговите бизнис интереси.”
Тој нагласи дека истото важи и за Кисела Вода, каде што актуелниот градоначалник оставил свој послушник за кандидат. „ВМРО-ДПМНЕ поинаку не знае освен по секоја цена да се задржат истите луѓе, за да може да ги спроведуваат истите криминални активности,” заклучи д-р Филипче, повикувајќи на потребата од промени и нови, способни лидери во општините.
