Сообраќајот на државните патишта низ земјава утрово се одвива непречено, но по претежно влажни коловози, информираат од АМСМ.
Поради зимски услови, на сила е забрана за сообраќај на тешки товарни возила на планинските превои Плетвар, Ѓавато, Пресека, како и на патниот правец Маврово – Дебар – Струга и на граничниот премин Ќафасан.
Од АМСМ потсетуваат дека од 15 ноември 2025 година е на сила законската обврска за задолжително поседување зимска опрема во сите возила, без разлика на моменталните временски услови. Оваа обврска важи до 15 март 2026 година.
Интензитетот на сообраќај надвор од градските средини е умерен, а на граничните премини од македонска страна нема подолги задржувања за влез и излез од државата.
АМСМ апелира до возачите да ја прилагодат брзината на движење, да ја почитуваат сообраќајната сигнализација и да управуваат внимателно, особено на патиштата низ котлините, речните долини и клисурите каде постои опасност од одрони. Посебна внимателност се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Патниот правец Охрид – Ресен преку Националниот парк Галичица останува затворен за сообраќај за сите видови возила во периодот од 21 ноември 2025 до 31 март 2026 година, поради сезонски зимски режим.
Поради изведување градежни активности, на повеќе патни правци е воведен изменет режим на сообраќај. На Коридор 10, на делницата Прилеп – Битола, сообраќајот е пренасочен по регионалниот пат Р1101. На државниот пат А2 – скопска обиколница, во делот од клучка Волково до Кондово, поради рехабилитација, затворена е левата лента за претекнување.
На експресниот пат А2 Крива Паланка – Страцин, кај километар 14+200 во близина на селото Петралица, во текот на денот сообраќајот се регулира рачно, а во ноќните часови со семафори. Истовремено, продолжуваат градежните активности и на регионалниот пат Косоврасти – Мелнички Мост, како и санацијата на мостот Здуње на делницата Гостивар – Стража, каде сообраќајот се одвива наизменично со семафорска сигнализација.
Возачите се повикуваат редовно да се информираат за состојбата на патиштата и да го планираат патувањето согласно актуелните услови.
