На граѓанската трибина „Се бориме за нашиот дом“ во Јегуновце, претседателот на СДСМ, Венко Филипче, му испрати силна порака на премиерот Христијан Мицкоски, истакнувајќи дека не станува збор за мразење, туку за презир. Филипче нагласи дека Мицкоски често зборува за омраза, а всушност самиот е извор на деструктивна реторика која го дели народот и ја дестабилизира државата.
На трибината, Филипче нагласи дека луѓето го презираат Мицкоски заради сите лаги и манипулации. „Никој тебе не те мрази Мицкоски – туку те презира. Те презира за сите лаги и безочни манипулации кои ги сервираш секогаш кога ќе бидеш соочен со неуспех или вистина која те боли. Те презираат оние кои со лаги ги измами за да дојдеш на власт, а потоа не исполни ништо. Те презираат сите кои веруваа дека си човек од народот, а испадна дека си најарогантниот премиер кој го имала Македонија.“
Во своето обраќање, Филипче истакна дека обидите на Мицкоски за замолчување и страв се залудни. „Никого нема да замолчиш. Никого нема да исплашиш со заканите и пропагандата – затоа што одамна си прочитан. СДСМ нема да молчи пред политичар што ја валка Македонија со омраза, што шири поделби, што мисли дека патриотизмот е да ги хушкаш луѓето еден против друг. Од таквиот патриотизам се сведовме на земја без иднина, без развој, во која сè што правиш ти и твоите е стратегија како да се одржите на власт,“ рече Филипче.
