Градоначалникот на Општина Центар, Горан Герасимовски, кој се кандидира за втор мандат, изрази уверување дека граѓаните ќе го поддржат неговиот концепт „За Центар што го сакаме“ и во вториот изборен круг. „Се надевам дека сите оние коишто веруваат во нашиот концепт дека и во вториот круг ќе го дадат својот глас за заедно да ја водиме општината и во наредните четири години“, изјави Герасимовски.
Тој истакна дека и покрај тоа што не имале мнозинство во советот, успеале да создадат интересен состав на советнички групи од различни политички партии. „Продолжуваме да работиме во интерес на граѓаните. Сите советнички групи и политиката ќе биде целосно тргната на страна во Општина Центар“, додаде тој.
Герасимовски нагласи дека неговата програма е создадена во соработка со граѓаните, за разлика од некои противкандидати кои, според него, ги копираат проектите. „Ние самите проекти ги пишуваме со граѓаните четири години наназад. Нашите буџетски форуми кои ги предлагаме ќе ги направиме во текот на следната недела“, рече тој.
На крајот, Герасимовски упати повик до сите центарци, вклучувајќи ги и оние кои во првиот круг гласаа за други политички партии, да се приклучат на неговиот концепт и заедно да работат на подобрување на животот во општината. „Ги повикувам сите оние жители, сите оние центарци коишто во првиот круг дадоа глас на одредени политички партии и независни кандидати да ни се приклучат во концептот „За Центар што го сакаме“ за заедно да ја направиме општината поубаво место за живеење на сите“, заклучи Герасимовски.
