Градоначалникот на Општина Крива Паланка, Сашко Митовски, реагираше откако не добил покана за пуштањето во употреба на магистрален пат што минува низ територијата на општината.
Во своето обраќање до јавноста, тој посочи дека изостанувањето на покана за првиот човек на општината не може да се смета за случајност.
„Да се пушта во употреба магистрален пат што минува низ општината, а притоа да не се покани градоначалникот, не е протоколарна грешка – туку прашање на принцип и политичка зрелост“, наведува Митовски.
Тој оцени дека со ваквиот потег институциите се ставаат во втор план, а во преден план доаѓа партиската припадност.
Според Митовски, подготовката, проектирањето и финансиската конструкција за патниот правец биле обезбедени во период кога на власт била СДСМ и проектот бил дел од програмите на државните патишта.
„Со туѓ труд и со туѓи перја навистина е лесно да се фотографира“, наведува тој во реакцијата.
Градоначалникот порача дека граѓаните очекуваат резултати, меѓусебна почит и реални проекти, а не политички маркетинг.
„Развојот не се гради со пресечени ленти, туку со одговорност и вистинска работа“, истакнува Митовски.
