Граничниот премин помеѓу селото Рестелица (Косово) и селото Жужње (Македонија), кој функционира сезонски, и ова лето ќе биде отворен за патнички сообраќај. Ова го потврди градоначалникот на општина Маврово и Ростуше, Медат Куртовски, кој истакна дека отворањето се очекува во наредните денови.
Преминот, кој се наоѓа на територијата на општина Маврово и Ростуше, првпат беше отворен како привремен во август 2003 година. Сепак, поради лошата патна инфраструктура, беше затворен, а сообраќајот на него беше минимален.
Во 2018 година, со залагање на локалната самоуправа, преминот повторно беше отворен за летниот период и оттогаш, со исклучок на 2020 година поради пандемијата, редовно функционира секоја сезона.
Од косовска страна веќе е изграден нов асфалтен пат, а од македонска страна е најавено започнување на градежни работи. Ова се очекува значително да ја зголеми фреквенцијата на преминување и да го олесни пристапот за локалното население и туристите.
Општините Маврово и Ростуше и Драгаш (Косово), на чии територии се наоѓаат селата Жужње и Рестелица, неодамна потпишаа меморандум за збратимување. Градоначалниците Куртовски и Беџет Џеладини ја поздравија иницијативата, изразувајќи надеж дека таа ќе придонесе за продлабочување на меѓусебната соработка, економски развој и олеснување на прекуграничното движење.
