Европската комисија ги отфрли предлозите на транспортните компании од земјите од Западен Балкан за надминување на проблемот со ограничувањето на престојот во Шенген зоната, што повторно ја отвори можноста за протести, блокади на граничните премини и сериозни економски последици во регионот.
Според информациите објавени од црногорскиот медиум Вијести, претставници на Комисијата јасно порачале дека барањата на превозниците се неизводливи и спротивни на шенгенските правила.
Транспортните компании бараа:
- професионалните возачи да добијат посебни визи или документ што ќе им овозможи подолг престој во ЕУ
- времето поминато во транзит низ ЕУ да не се пресметува во ограничувањето од 90 дена
Целта беше возачите да можат да работат без да го менуваат живеалиштето, односно без административни процедури кои значително го отежнуваат бизнисот.
Но од Брисел порачале дека единствена опција е виза од конкретна земја-членка, и тоа само за престој подолг од 90 дена – решение кое, според превозниците, не е функционално за меѓународниот транспорт.
