Поранешниот градоначалник на Општина Аеродром, Ивица Коневски, преку социјалните мрежи упати апел до локалната самоуправа за помош во доизградбата на Руската црква Св. Троица, која започна во 2015 година, во непосредна близина на Спортскиот центар Јане Сандански и Паркот на езерата.
Коневски истакнува дека, според одобрението за градба, планирано било црквата да вклучува капела Св. Георги Победоносец, посветена на паднатите борци, како и кујна за бездомни лица, што би било значајна поддршка за социјално загрозените.
„На жалење, црквата остана недоградена и сега претставува непривлечен и запуштен дел од Аеродром, кој е често посетуван од домашни и странски гости поради близината на Спортскиот центар и Паркот на езерата. Овој запуштен простор претставува и опасност за безбедноста на граѓаните, особено во вечерните часови“, напиша Коневски.
Со апелот, тој побара локалната самоуправа да се вклучи во процесот на завршување на изградбата на црквата и создавање на поубав и побезбеден простор за сите посетители.
