Градоначалникот на Карпош и кандидат за нов мандат, Стевчо Јакимовски, во своето утринско видео обраќање упати критика кон својот противкандидат од ВМРО-ДПМНЕ, Сотир Лукровски, обвинувајќи го за предизборен поткуп и некоректно рекламирање на приватна болница.
„Втор ден по ред ја рекламираш приватната болница ‘Систина’. Толку ли сте во паника? Тоа, прво не е коректно кон јавното здравство, второ – кон останатите приватни клиники, и трето – со попустите што ги нудиш во моментов правиш предизборен поткуп, а за тоа веднаш треба да се позанимава Обвинителството,“ порача Јакимовски во видеото.
Во недела, двајцата кандидати ќе се соочат во вториот изборен круг за градоначалничката функција во Општина Карпош. Јакимовски, кој зад себе има четири мандати, влегува во трката како искусен локален политичар, додека Лукровски, кој до неодамна беше непознат на пошироката политичка сцена во Скопје, настапува како ново лице на ВМРО-ДПМНЕ.
