Кандидатот за градоначалник на Општина Карпош и актуелен градоначалник, Стевчо Јакимовски, обвини дека Државната изборна комисија (ДИК) му одобрила само 3.500 евра за кампањата во вториот круг од локалните избори, додека на неговиот противкандидат му биле распределени останатите средства до 56.000 евра.
„ДИК ми одобри 3.500 евра за кампања, а на Соте остатокот до 56.000 евра. И мислат дека така ќе ме сопрат? Џабе ви е брашното, џабе ви се заканите, џабе ви се министрите што ги шетате низ Карпош, џабе ви е негативната кампања. Моите проекти зборуваат сами за себе. А мојот број останува ист 070 225 055,“ изјави Јакимовски преку своите официјални канали.
Тој нагласи дека „Карпош не се купува со пари“, туку се „освојува со работа, чесност и љубов кон народот“, додавајќи дека нема да се откаже од борбата и дека граѓаните сами ќе ја препознаат, како што рече, разликата меѓу делата и празните ветувања.
